踏入38歲的「朱基」，去季效力南華時於足總盃決賽踢足全場，更當選最有價值球員，證明有能力應付職業賽事，可惜隨着球隊「自降」，「朱基」只好無奈退役：「梗係想繼續踢，我咁鍾意踢波。但其實無話可唔可惜嘅，就算今年踢落去，出年又要諗同一問題，始終有一日要退。」
轉變突如其來，要適應談何容易：「足球陪咗我30幾年，我好鍾意踢到好攰嘅感覺，做運動員就係想投入同享受。依家我返舖頭做足8個鐘，都唔會有番呢種感覺，初時真係會唔慣到瞓唔着。」同一個足球，同一個球場，「朱基」坦言現在身為教練視野更廣闊：「最大分別係好緊張嗰陣都冇得落去踢，但就睇多咗好多嘢，以前只需踢好場波，依家要顧及20個球員，預備1場比賽都要好多工夫。」