「潮韋」撻着雷霆中止3連敗

今仗雷霆甫開賽即反客為主同黃蜂「鬥爆」，其中韋斯布克半場已「撻着」攻入16分，可惜球隊仍落後55比59入更衣室。去到下半場，韋斯布克體力下降命中率大跌，幸一眾後備兵如費爾頓同謝拉美格蘭「交到貨」，最終雷霆贏101比91，重上勝軌。

勇挫獨行俠 湖人4連勝

同日西岸上演「褪色大戰」，由獨行俠主場迎戰湖人，雙方今仗鬥得激烈，結果湖人憑蘭度攻入23分，戰至加時以107比101贏波，取得4連勝之餘，更成功中止對小牛（現稱獨行俠）14連敗的劣績，而對上一次湖人贏獨行俠，已經要追溯到2013年4月，當時湖人仍由高比拜仁掛帥呢！

至於西岸「一哥」勇士到訪多倫多幾乎「出事」，昨日球隊作客速龍，勇士今仗有主將史堤芬居里傷愈復出，帶領球隊一度拋甩27分，但主場的速龍死命狂追，於第4節末段更收窄到只落後1分，可惜此時速龍主將迪羅臣接連「蝦碌」，累球隊未能上演反勝好戲，結果勇士贏127比125，取得2連勝。