科蘭候命出擊 oncc東網 5:30pm直播 傑志鬥冠忠南區
睇東網見證科蘭首騷！「中銀人壽香港超級聯賽」今午於旺角大球場上演重頭戲，由剛於簽入烏拉圭球星科蘭的傑志，於主場迎戰冠忠南區。「藍鳥」主教練朱志光透露，會將科蘭列入最後18人名單，今仗更有望後備登場！想睇這位兩屆歐洲金靴獎得主首度在港獻技，就一定要留意東網直播喇！（東網on.cc周日下午5時30分直播）
日前落實科蘭、費蘭度及華杜斯為亞冠外援的傑志，上仗出戰銀牌賽4強於平安夜在華杜斯停賽缺陣下，戰至加時以1比3不敵陽光元朗。隨着香港飛馬於前晚對陽光元朗痛失2分，傑志主教練朱志光認為今仗更加機不可失，希望在出戰亞冠前能於聯賽盡量搶分︰「每一場聯賽對我哋嚟講都重要，而南區對住我哋都有不俗表現，佢哋會做好多防守，要撕破對方防線要花啲工夫。」
對於科蘭的上陣機會，「朱Sir」則暗示這位烏拉圭射手很大可能會後備亮相︰「喺自己腦裏面已準備好畀科蘭後備上陣，喺適當時候一定會放佢落場，今（昨）日睇佢操練，都睇得出佢之前有持續做運動，只係擔心佢喺適應時差同休息方面唔夠。我會再同佢傾談一下，我都想佢盡快了解我哋嘅踢法。始終比賽要尊重對手，同時都要着重團隊精神。」
對於科蘭在首課操練的表現，「朱Sir」亦認為他表現活躍，跟隊友相處亦沒有問題，一眾球員在更衣室的氣氛亦很好，並指他作為球星加盟球隊，無論對隊中年輕或較具經驗的球員，均帶來了一些刺激的作用。
鄭兆聰對借將陳肇鈞有期望
冠忠南區於日前從東方龍獅借用中場陳肇鈞至季尾，球隊僅得門將謝德謙因傷缺陣，主教練鄭兆聰期望在隊中傷兵相繼康復，兼且馬高斯坐完波監復出助拳，能踢得出好表現。對於傑志簽入大牌球星，Ricky Sir則強調先做好自己本分︰「傑志人腳強盛，當然唔容易應付，但我哋都想喺聯賽攞分，亦唔可以單純只係睇對手牌面上有邊個，因為佢哋喺踢法同人腳上都可以有好多變數，希望踢得番上場對東方嘅好表現。」Ricky Sir亦對借將陳肇鈞寄予厚望︰「見到佢嚟到幾開心，亦見佢獲得隊友歡迎，希望佢可以喺下半季踢得好啲，始終借得佢過嚟，都希望佢可以有上陣機會，同埋可以幫到球隊。」
