五代港將同心衝擊GT4錦標
全港車迷期待已久的「杜拜24小時耐力賽」今日舉行，香港隊集五代車手於一身，由關兆昌、李英健、歐陽若曦、方駿宇、唐偉楓破天荒攜手合作出戰，東網on.cc全程直播，香港史上最強的黃金陣容，於杜拜賽車場上與40支國際頂尖車隊展開激戰，誓要贏得GT4組別冠軍，讓香港區旗可歷史性地在杜拜升起，創造本港賽車史冊新一頁！(東網on.cc周五下午5時30分直播)
香港車迷一般較熟悉緊張刺激的「短途賽」，戰車比賽一定圈數後即分勝負，不過今次5位車手出戰的杜拜24小時耐力賽，形式稍有不同，每部賽車需由多位車手輪流駕駛，以24小時內行駛距離最遠的車隊為冠軍。車手除要24小時間都保持賽車狀態，更講求團隊合作及策略，應付各種突發情況，征戰賽車界多年的李英健表示：「人有生理時鐘，尤其夜晚轉日頭嘅時間，個人會特別攰，更容易出錯。而呢個其實係個場最好condition嘅時間，因為啱啱出太陽，天氣冇咁熱，我哋俗稱叫『Happy hour』，環境轉變性亦較高，呢段時間負責嘅就可能會係我同歐陽若曦。」
歐陽若曦（Darryl）曾於2013年同一賽事中奪得總季軍，亦曾兩次贏得巴瑟斯特12小時耐力賽冠軍，可說是於全隊中擁有最多耐力賽經驗，他表示會與隊友分享致勝方法：「耐力賽最大分別，就係完成賽事比較重要，揸法同心態要保守少少，最緊要係唔好撞車，呢方面嘅決定要好快，亦都好靠經驗，我跑咗咁多次耐力賽都未試過有發生碰撞，咁先會攞到好成績，我哋目標亦當然係要贏GT4組別冠軍！」
連廁所位置都要計埋
港隊日前已到達杜拜，更即時「踩場」熟習賽道及戰車。自2004年退役後復出的關兆昌，與本港首位F1實習車手方駿宇（Adderly）由於是首次參加杜拜耐力賽，相關經驗不多，Adderly指睇場時就連廁所位置亦不放過：「我會睇多啲細緻位，因為如果臨落車廁所有人用緊，另一個喺邊要即刻知，或者路面發生意外要點樣處理，愈多後備Plan就愈省時。」
至於久疏戰陣的關兆昌坦承速度及體能都未及隊友，但就會加強訓練，用經驗協助隊友：「始終10幾年冇賽過車，我一定唔夠佢哋4個快，但圈速應該會穩定啲，希望我可以慢慢重拾速度，唔會拖得佢哋太慢啦。自己亦多咗做重量訓練，令頸部可以適應賽車時嘅壓力，我哋有好戰車同好車手，發揮應該無問題！」
練習賽圈速居首
事實上，車隊昨日在杜拜進行練習賽及排位賽，其中歐陽若曦在練習時造出2分10秒484的圈速，是GT組上午練習時段的最快成績，有個好開始。正賽將於今日展開，大家記得於下午5點30分留意東網on.cc直播，見證歷史一刻！
李英健
年齡：41歲
威水史：2004年亞洲寶馬方程式總冠軍
2012年首屆奧迪R8 LMS盃總冠軍
2017年夥拍唐偉楓於寶珀GT亞洲系列賽奪Silver Cup寶座
關兆昌
年齡：54歲
威水史：1993年1天內連奪澳門格蘭披治大賽車澳門盃、Supercar賽及東望洋大賽三料冠軍
1994年澳門東望洋大賽，成為首位寶馬廠隊的亞洲車手
歐陽若曦
年齡：37歲
威水史：2006年保時捷Carrera亞洲盃
2011及2012年巴瑟斯特12小時耐力賽冠軍
2013年香港傑出運動員
方駿宇
年齡：27歲
威水史：2013年奧迪R8 LMS盃專業組全年總冠軍
2015年成為蓮花F1車隊實習車手，屬香港第一人
2016年澳門GT世界盃非廠隊車手冠軍
唐偉楓
年齡：22歲
威水史：2015年以19歲之齡首戰紐布靈24小時耐力賽
2017年隨李英健於寶珀GT亞洲系列賽奪Silver Cup寶座
賽事資料
杜拜24小時耐力賽（24 Hours of Dubai）
日期及時間︰1月12日下午6時至1月13日下午6時 (香港時間)
地點：杜拜賽車場
車手：關兆昌、李英健、歐陽若曦、方駿宇、唐偉楓
代表車隊：亞洲鳳凰車隊（Phoenix Racing Asia）
車型：奧迪Audi R8 LMS GT4賽車
賽道簡介
杜拜賽車場自 2004 年正式落成啟用，是區內第一個標準賽車跑道場地，並符合國際賽車組織 FIA 的認可，賽道全長5.39公里，每圈共16個彎。