陳婉婷改變為了走更遠的路

於2015至16賽季帶領過東方勇奪港超聯冠軍,並曾獲亞洲足協選為年度最佳女教練的陳婉婷(牛丸),今季在球隊教練團的角色,由主教練轉為技術分析員,並將以領隊身份帶隊出戰亞冠盃外圍賽,如此改變,令她有更大空間去增值自己,為未來作最佳準備,令自己走得更遠!

對於輿論及壓力,「牛丸」明白兩者均是執教老牌球會所必須面對的,不過相比起壓力,她更在意自己的發展空間,因此於去季季尾決定辭任主教練一職︰「大前提係想進修,因為喺過去呢年半修讀Pro-license(亞洲足協專業教練牌照),每次都要離開香港大約兩個禮拜,同埋有啲功課要去做,真係要花時間同心機。我覺得既然有決心讀好個Pro-license,趁自己仲叫做後生,專心讀好個課程,將來仲有好多日子去捉緊機會。」

世盃韓將做同學

務求達到執教亞冠隊伍的正式資格,早前曾赴英國參與亞協Pro-license課程的「牛丸」坦言,今趟英倫之行除了向班中同學偷師外,亦見識到現今足球世界的競爭有多大︰「今次呢個Pro-license係跟KFA(南韓足總)去嘅,可以見識到出面嘅世界,接觸到更多高水平嘅教練。成班同學除咗我哋3個外地教練之外,全部都係南韓人,本身係喺南韓知名度好高、踢過世界盃嘅名宿,又或者本身教緊韓職K1嘅教練,所以喺佢哋身上學到好多嘢。喺南韓,即使踢過世界盃,佢哋喺修讀理論、運用電腦等都會付出好多努力,當地競爭好大,你唔學埋呢啲你就冇資格去做教練,可見做教練唔係咁簡單,要不斷求變。」

「牛丸」今季另一個身份,就是以領隊身份帶球隊參加亞冠賽事,並負責行政工作,在獲頒亞協年度最佳女教練而建立一定的知名度後,令她早前出席亞冠抽籤儀式時,獲得不少球會代表上前問好:「呢個新身份都係一個學習嘅機會,慶幸我哋上年踢過一次,起碼最緊要嘅規則同註冊等,我哋都大概清楚。行政嘅嘢盡量去學啦,球會都有好多唔同人去幫手。之前喺亞冠抽籤儀式,好似舊年我哋對過嘅川崎前鋒,佢哋都好主動過嚟同我哋傾偈,咁我都有恭喜佢哋。代表球會出到去認識多啲唔同地方嘅人,對我哋將來建立一啲關係,例如集訓、友誼賽等都好有利。」

圖/文︰何彥霆 (部分圖片由受訪者提供)