香港桌球天王傅家俊昨日又大一歲，正式告別「三字頭」踏入「四張嘢」，他坦言有點「感覺」，但睇到女兒慢慢長大更覺得自己責任重大，問到生日願望，他直言：「想打少啲比賽。」原來都是想多陪囡囡，享受家庭樂！
早前跟家人外遊「叉電」的Marco，難得在香港與家人慶生，女兒一個親吻、一句「Daddy,生日快樂」，已經冧爆：「其實近幾年的生日都在香港過，眨下眼自己都40歲。」講起由「3」字轉到「4」字，Marco笑言：「感覺無29歲去30歲咁強烈，當年真係有啲失落，依家轉到4字頭，都有少少（失落）感覺，但可能有佢哋（妻女），都無乜時間靜落嚟諗感覺。」
每個人大一歲都有生日願望，問問這位桌壇天王，他笑說：「生日願望？想打少啲比賽，哈哈！」他表示很想多留時間與囡囡及太太一齊，今季他缺席了幾個外圍賽，而且又減少了比賽，可以「願望成真」。壽星仔Marco更走去「扮靚」，他在社交網與粉絲分享慶生，上載幾張自己去剪髮的相，寫道：「正式踏入4字，一切從頭開始」，過萬粉絲Like爆，並紛紛向這位香港桌壇天王送上生日祝福。