傑志陽光元朗做Good Show！
高級組銀牌賽4強一連兩日迎來激戰，今午3時假旺角大球場上演的戲碼，由衞冕的傑志迎戰陽光元朗。傑志雖有中場核心華杜斯停賽缺陣，但球隊上下仍對進身決賽充滿信心。至於最近表現不俗的陽光元朗，主帥曾昭達亦表示，球隊無論在場上戰術、球員心理及狀態方面已做好準備，並希望打場好波畀球迷睇！
今季在所有賽事未嘗一敗的傑志，上仗於菁英盃分組賽憑着前匈牙利國腳中場華杜斯一箭定江山，以1比0小勝R&F富力，惟這位贏波功臣於比賽尾段直接領紅被逐，今仗無緣上陣。
朱Sir：華杜斯停賽冇有怕
傑志主教練朱志光承認，華杜斯是球隊重要一員，但認為陣中有足夠的人腳作調換︰「我印象中華杜斯今季未有缺席過任何賽事，雖然球隊冇咗佢會有少少影響，不過傑志擁有足夠嘅人腳。同埋下半季我哋有時會一個禮拜踢兩三場，到時佢都冇可能踢晒，所以呢場都算係一個為下半季預演嘅機會。」
陽光元朗最近兩仗未能取勝，均在領先的優勢下被和富大埔及夢想FC追和，但主教練曾昭達對球隊表現仍感滿意︰「球隊上兩場慢慢有番啲傷兵復出，情況好咗好多，雖然兩場都打和，但表現其實都算唔錯。上星期嘅菁英盃，今場同下星期嘅足總盃，3場賽事都對我哋好重要，當然會有特別嘅部署，不過球員喺心理同生理上嘅準備，可能比起戰術更重要。」元朗目前仍有羅振庭、陳衍光及雲迪奴域養傷，幸已復操的葉子俊則有望後備上陣。
