唔知阿邊個講過，出嚟行走江湖，乜嘢都可以輸，唯獨相頭唔可以輸！做球員雖然唔係行走江湖，但一樣要喺形象方面有堅持。
識我嘅朋友都知我好玩得，有好多朋友嘅老婆或者女朋友，甚至以為我係癲嘅。但其實喺做嘢嗰陣我係好認真嘅，好似球隊推出新措施，或者對球員有一啲要求咁，我一定會嚴格執行，「老竇」都無情講。
好似夢想FC非常重視球員嘅形象，大庭廣眾，唔理係年輕新秀定經驗老將、本地球員定外援，都要注意言行舉止，要保持到職業球員嘅形象。練完波唔着上衫踢住拖咬住口煙，你個人可能覺得自己好有型，但事實上只會令外界睇死你係波牛，幾好波都無用！
另外，喺比賽嗰陣有時因為不滿嘅情緒，或者想表達意見，難免會講咗粗口，呢樣嘢我好理解，因為我都做過球員，但我就會要求唔係喺場上，好似坐喺看台睇波嘅球員，一定要克制，唔可以話爆就爆，因為喺看台嘅球迷，有男有女、有老有嫩，一唔小心就會嚇親佢哋，以為球員就會咁，唔好話畀佢哋嘅仔將來踢波，想佢哋再入場睇波都會好困難。
信我啦！形象堅係緊要喎！
夢想FC CEO 梁智駒