理文爆Seed重上勝軌

理文早前於聯賽接連失分，故為搶3分今仗表現積極，開賽初段即搶攻，先有史提芬彭利拿禁區內抽射僅告斜出。不過客軍冠忠南區5分鐘憑藉一次角球機會，陳文輝開出左路角球，隊友劉學銘門前頭槌一頂破網，領先1比0。

雖先失一球，但理文主場素有「地獄主場」美譽，失波後攻勢更凌厲。戰至13分鐘，史提芬彭利拿左路接應謝朗軒二傳頭槌建功，追平1比1。6分鐘後，彭利拿趁南區謝德謙拍出域陀的射門不遠成功「執雞」，反超前2比1。理文之後再憑利馬於26分鐘突破敵衞禁區頂的直射，拉開比數至3比1。冠忠南區亦積極反擊，在完半場前車潤秋開界外球，隊友基奧乘敵衞解圍不遠抽射入網，無奈越位在先慘食詐胡，南區落後1比3入更衣室。

易邊後，冠忠南區換入梁子駿及許宏鋒，搶回不少攻勢，但都無功而還，到78分鐘更幾乎再度失守，被羅俊仁禁區內起腳，幸門將謝德謙及時救出。至比賽末段南區換入比圖盡地一煲，此子於91分鐘中路遠射甚具威脅，卻被門將陸平中沒收。最終理文成功守住3比1勝果，取得今季聯賽第2場勝仗。

陸平中︰落後時團火都無熄過

賽後理文門將陸平中表示今仗球隊上下都有爭勝決心：「球隊上下一直都知道12月呢幾場一定要贏，上場係因為後防唔集中失波，今場大家都有爭勝心，見到我哋就算上半場失一球團火都無熄過。教練團嘅事唔到我講，呢場勝仗係想話畀所有人聽，要對教練有信心！每個精心部署、細節位，都係教練今個星期調整嘅成果，所以贏波唔只係球員功勞！」