潮韋生日被寸龜一般智慧

周日踏入29歲的韋斯布克全場取得27分，還有6個籃板及5次助攻，戰至第3節帶領雷霆爆發甩開比數差距，不過期間「潮韋」表現寸到爆，每次射入3分球就向小牛後備席報數，如此囂張令網友「睇唔過眼」，罵他只懂羞辱魚腩。

其實雷霆有「甜瓜」安東尼及阿當斯兩位正選休息，幸好保羅佐治挺身而出攻入37分、8個籃板及5次助攻，足夠令雷霆延續反彈勢頭。相反，「德國槍」魯域斯基僅得5分、1個籃板同1次助攻的數據，完全失去巨星風範，阻止不到小牛兩連敗。

溜馬大敗 楊格嬲到扯爛衫

另外，火箭作客以118比95擊敗溜馬，完成6連勝；占士夏登取得26分、5個籃板同15次助攻，個人連續14場得分「20＋」，而且第1節已經交出9次助攻，打到主隊溜馬全無還擊之力，溜馬球員楊格更加疑似失控，比賽中發茅扯爛波衫。值得留意是中國球星周琦獲派上陣3分32秒，取得1個籃板及2次封阻，總算對火箭帶來貢獻。

至於另一場話題之戰，長勝軍塞爾特人主場以95比94險勝速龍，即使當家球星艾榮因撞爆面骨缺陣，但另一球星荷福特腦震盪後復出孭起搶分重任，得到21分、3個籃板及4次助攻，帶領綠軍完成12連勝。