新手爸爸再鍊GT世界盃 Darryl為愛女而戰
香港「波子王」歐陽若曦（Darryl）正為第64屆澳門格蘭披治大賽車「國際汽聯GT世界盃」備戰，昨日出席打氣活動「VLT Race to Win Party」時，表示希望把澳門站冠軍送給女兒。
Darryl今年續駕駛「檸檬茶戰車」出戰於本月16至19日舉行的澳門格蘭披治大賽。賽前於奧海城為一連3日的打氣活動主持開幕禮，更即場試玩「Forza Motosports 7」賽車遊戲，Darryl打機亦有姿勢有實際，輕鬆鍊贏對手！
Darryl剛於10月榮升爸爸，到時愛女歐陽良慧剛滿月未會隨行，Darryl表示將為囡囡而戰：「有咗囡囡兼顧更多，不過去到比賽，就會成副心機放晒落去。如果我贏咗冠軍，一定會送畀囡囡！」這位「新手湊仔公」表示湊女雖辛苦，但絕無影響備戰，講到愛女更甜笑：「頭一個月湊女真係好攰，成日要起身餵奶、換尿片。但臨近比賽時會休息多啲及做多啲GYM。」
上海站封王 打下強心針
Darryl於9月贏得GT亞洲系列賽上海站冠軍，為澳門賽事打下強心針：「澳門係最後嘅賽事，其實成年都係為呢個賽事備戰。今年我哋車隊表現唔錯，贏得上海站增強咗信心，我會努力去爭取好成績。」