大家照鏡嘅時候，通常腦海入邊會浮現啲咩問題呢？最多人問會唔會係「點解我老竇唔係李嘉誠呀？」定係：「點解我咁靚仔就要甩頭髮？你哋咁樣衰就唔使甩頭髮？」不過，相信最多人會問「點解我咁後生就咁大個肚腩嘅？」
平日如果工作忙食無定時，成日坐兼無時間、無動機做運動，加上30過後，不論男女都好容易「向橫發展」，出現大肚腩。個人嚟講，「大肚腩」堅係接受唔到，唔係追求着衫型唔型（因我本身已十分型），而係想身體健康啫。所以我一直有去健身，之前無論幾多嘢做都好，點都會去舉吓，點知呢個暑假開始搞夢想FC，工作量完全超乎我想象，莫講話去健身，我連想約班老友去踢場波都無時間！
擔心無時間去健身，Keep唔到副Body，唔想好似「大頭」咁孭住個大肚腩，可以點？點先可以嘢照做、身照健？咪就係安排球隊定期拉大隊去健身囉！要成功「假公濟私」，首先要搵到一間健身室，可以同一時間容納到成隊廿幾三十人，好開心可以搵到Let's Fitness，唔止地方夠大夠闊落，仲有足夠嘅專業健身教練駐場，等隊中一啲好少健身、甚至無健過身嘅職、球員，都可以得到「照顧」。
球隊早前進行咗首次集體健身，大家都好投入認真，第二日個個都周身酸痛，證明佢哋有盡力去做，先會有肌肉反應。見到大家都咁落力，嚟緊我仲會安排泰拳同瑜珈訓練畀大家，咁我可以乘機操埋一份之餘，亦可以提升球員各方面嘅力量，實在一舉幾得！大家睇到啦！我係唔係好識為球員着想先？
夢想ＦＣ ＣＥＯ 梁智駒