ＮＢＡ中國賽深圳站今日下午兩點舉行，由上季總冠軍勇士對木狼，勇士班球星似乎對香港更感興趣，尋日拉隊南下香港玩餐飽，當中最佳防守球員積蒙格連負責帶隊，除咗有大衞韋斯坐船遊維港，新加盟嘅歷克楊格仲去咗遊客必到嘅旺角女人街掃貨添！
勇士球星訪華真係好忙，當中史提芬居里、奇利湯臣同伊古達拿約埋F1「黑帝」咸美頓喺深圳打高爾夫球，積蒙格連就仲巴閉，負責做「導遊」帶住柏祖利亞及利雲斯頓等一班隊友玩轉香港，期間助教米克布朗陪大衞韋斯同達美安鍾斯坐船遊維港，佢哋畀人認出後都好友善咁同粉絲合照。
歷克楊格同麥基就殺落女人街掃貨，仲將自己拎住大袋戰利品嘅相上載到Instagram，話畀大家知佢哋喺香港。勇士對木狼於上海站嘅賽事，就喺嚟緊星期日（8日）晚上7點上演，唔知佢哋離開深圳嘅時候，會唔會又嚟香港走番轉呢？
據ＮＢＡ賽會宣布，2018年明星賽取消東西岸傳統，改為「打機式」組隊，新模式保留投票揀正選制度，當中得票最高嘅東岸同西岸球星，可以隊長身份喺得票較高嘅球員當中，選擇心水正選隊友，而且東岸隊長可以揀西岸球員，西岸隊長又可以揀番東岸球員，聽落堅得意喎！