筆者於《東方波經》專欄，通常會寫歐洲（英超、法甲、歐聯）及美職等外國波，但由於今日喺旺角場會舉行「2017香港賽馬會社區盃」，因此不得不提呢項盛事。
其實熱愛足球嘅朋友，係冇分外國波或本地波，正如筆者都70有3已達退休高齡，仍有負責香港嘅學校青訓、擔任荃灣區足球大使，以及與「雷神」莫雷拉從以波會友踢衞生波，發展至搞慈善足球，「雷神」仲話尋日無論係《東方日報》，抑或英文報章都大事報道社區盃，大讚辦得有聲有色，當然有賴於足總及馬會宣傳部群策群力，查實為搞好呢項盛事，大家已籌備咗4個月之久。
先講表演賽雷神邀請隊對桂神邀請隊，兩軍除有昔日本地名將黃文偉、劉榮業、山度士壓陣，更有在香港發展多年嘅喀麥隆球員卓卓及已在港定居嘅巴西兵法比奧助拳，呢場波已籌到135,000元善款，希望今日踢好波為慈善出力。
至於正本戲傑志硬撼東方龍獅，儘管傑志近年頻頻捧盃，不過喺近3屆社區盃都輸波，因此佢哋爭勝決心毋庸置疑。
另一邊廂，筆者母會東方龍獅開季表現欠佳，令眾將更加認真備戰社區盃，總監梁守志稱原本有份為雷神隊披甲嘅門神鍾皓賢，因要為東方龍獅鋼門葉鴻輝熱身，所以搵嚟另一前港腳「傻豹」陳樹明仗義打表演賽，可見雙方皆抱着打甩髀嘅戰意，堅有睇頭。
金句：今日旺角場社區盃，點只3料娛樂咁簡單。
黃興桂