孝順仔文家永捱出頭

父親是香港人、母親為威爾斯人的文家永（Daniel），自小便熱愛足球，他出戰西班牙丙B組的經歷，原來源於最初跟父親一個約定︰「原本阿爸希望我去英國讀大學，之後先試吓返嚟香港踢波，但當時大學校隊有個教練識得個西丙教練，邀請咗幾個球員去西班牙試腳，經過季前集訓後，我哋大約5至6個人一齊去咗西丙踢波，我就踢馬貝亞。」

人工奀棄升西丙隊一隊

文家永一直努力爭取表現及機會，一度獲得馬貝亞提供由U23梯隊提升至一隊以及續約機會，但亦正正因為父母影響了他最後的決定︰「其實我都有諗過留喺西班牙踢波，踢到3、4月左右有機會同一隊主教練傾計，佢邀請我去一隊爭正選位置，但係暑假先發覺人工唔啱。雖然父母一直都好支持我，但係如果人工唔夠多，照顧唔到自己，咁會對佢哋唔公平。」

去年夏天大部分港超球隊組軍接近完成的時候，Daniel才回到香港，之後重返在青年軍期間效力過的港會，由於球會僅以半職業姿態出戰港超聯賽，令他同時要兼任其他工作︰「自己喺港會踢完第一場後覺得自己有能力踢，所以同父母講唔想放棄呢個夢想，自己一路踢一路搵兼職做，教小朋友踢波、喺國際學校做體育老師等等。有時教完波或者返完學，夜晚7、8點仲要落球場練波都幾辛苦，但始終踢波係自己由細到大嘅夢想，所以一定唔會放棄。」

投理文圓職業球員夢

雖然Daniel今季於理文才正式展開全職球員生涯，不過他很快就能適應︰「喺西班牙踢波算係全職，因為日日都踢波同健身，同喺理文踢全職差唔多。我哋朝早日日練波，晏晝有機會就做gym。舊年踢兼職自己少機會加操，依家練完波有時間就加操去改進自己，對自己將來好啲。」文家永希望自己能夠將在西班牙學到的應用出來，協助球隊爭勝︰「西丙嘅速度同港超差唔多，我學識咗好多唔同踢法，例如球隊控波嘅能力，喺西班牙係會高啲，希望可以應用番出嚟。」

本周賽程

9月23日（六）賽馬會社區盃

傑志 Vs 東方龍獅

旺角大球場　下午5時30分

$80、$30（特惠票）

9月24日（日）高級組銀牌賽

標準流浪 Vs 夢想FC

斧山道運動場　下午2時30分

R&F富力 Vs 理文

青衣運動場　下午5時30分

註：銀牌門票價錢待定

圖/文：何彥霆