梁峻榮好想攞亞運金牌

運動員多以奧運為標準，每4年經歷一個循環，「肥榮」今年第2次參與全運會，意味各大型運動會他早已「集齊一套」，他以一句說話總結這4年：「『Sometimes change is what we need』，人就好似個容器，每日吸收唔同嘢，累積凝聚就會變成依家嘅你。4年嚟去全運、亞運及奧運見到唔同人和事，驅使我學習及改變、追求更好嘅自己。」回想首次出戰全運會，「肥榮」坦言當時「興奮到發癲」，但今屆在場上卻冷靜得判若兩人，得獎後為家人及離世的普教練兩次落淚，更為「肥榮」多添一份感性。

角色轉換學做Leader

隨着心境上的成長，擁有較多大賽經驗的「肥榮」擔演隊中老大哥，令他更緬懷以往「小師弟」時代：「2012、13年跟住張敬樂、張敬煒、蔡其皓、郭灝霆、楊英瀚一齊比賽，當時我認為香港隊所向無敵，呢個組合可以贏得全世界，點解時間唔可以過得耐啲，我仲好想學多啲嘢！」角色轉換讓「肥榮」偶有苦惱，惟有努力學做Leader：「一開始叫人做嘢會唔好意思，變咗事事親力親為。後來明白指揮嘅重要性，掌握隊友想法，自己亦會諗得宏觀啲。」

梁峻榮進步動力來自求勝心。

放大圖片

全運會佳績演活名字

年初「肥榮」曾豪言希望港人記得其名字，全運會的1金1銀令「梁峻榮」3個字登上報紙及電視，但大家或沒有留意名字背後的意義，「峻榮」代表要經歷嚴峻考驗才得到光榮，梁媽媽為此曾擔心自己改錯名，幸好「肥榮」即使面對挑戰，對單車的熱愛成為堅持的動力：「英國車神卡維迪殊講過，單車係好辛苦嘅運動，有咩令你由100%變到200%？好單純因為熱愛同埋追求，先可以爆發出更多力量，當你知道目標，你就會捉緊每一刻去做好。」犧牲與家人相處的時間、長年累月的傷患，「肥榮」不斷問自己是為了甚麼，最後他得出答案：「我好鍾意踩單車，唔甘心因為我未贏夠，短期目標係明年雅加達亞運會，一定要贏，我好想贏到亞運金牌！」

最愛食好西睇好書

單車手每日由早到晚不停埋頭苦練，「肥榮」坦言生活中除了單車還是單車，究竟車手是否真的這樣悶？幸好「肥榮」受家庭因素影響，「食好西」成為他克苦訓練外的一絲樂趣：「我咩都鍾意食，因為咩嘢食都要試，唔試又點知好唔好食呀！由於屋企以前開餐廳，所以我亦好鍾意煮嘢食，自己買餸煮感覺好好玩。」

保持語文水平為未來鋪路

車隊集訓的地方往往「與世隔絕」，令運動員與一切消遣絕緣，「肥榮」笑指「有得上網已經好開心」，所以大部分時間他都會一書在手，解悶之餘亦為自己的未來鋪路：「睇書可以維持自己語文水平，畢業後如果好少睇書，慢慢能力就會變差，運動員始終有一日要轉換角色重投社會，如果語文能力OK，到時會較順利。」他又謂對人物及知識類書籍有興趣，各位有好介紹不妨與他分享！

同肥榮快問快答

平時見慣「認真mode」梁峻榮，原來他都有搞笑一面，今次來個輕鬆版快問快答，讓大家更了解「肥榮」！

問：平均每星期踩單車幾多公里？

答：一星期練公路要踩約1000至1200公里，每日約150公里，即係由沙田踩去大埔來回15次左右！

問：「車神」黃金寶有咩行為令你感動同欣賞？

答：有次見佢喺Phone case寫咗一句「做好就係香港精神」，好認同追求目標同更高理想，就係將每件事用心做好，呢個就係致勝之道。

問：目前為止邊個比賽最深刻難忘？

答：仍然係2014年亞運公路計時賽，因之前「阿寶」參加5屆最差有第4，自己首屆又會係點？冇諗過最後會有牌，衝線嗰200米特別歷歷在目，好似過咗2、3分鐘咁耐。

問：全運會攞到1金1銀有咩意義？

答：梗係升職加人工啦！同埋愈嚟愈多人識我，我都覺得自己幾勁！

問：可唔可以講個梁峻榮嘅秘密？

答：呢題好難！其實我訓練成日偷懶，因為我成日都話練車踩咁快做咩，鬥車踩得快先有用，千祈唔好話畀人知！

圖／文：袁志浩