盡擸金腰帶展實力吳景聰 挑戰自我極限
時光飛逝，13年前的拳館助教，搖身一變已成為本港首席泰拳手，現年29歲的吳景聰，坐擁4條香港A組金腰帶，但兩年前決定放棄衞冕，目的就是為了挑戰更高層次。「我2009年贏第1條香港A組金腰帶，之後2013到15年連贏3屆，之後我就覺得再打落去，年年係我贏都冇意思，出面世界好大，輸贏其次，我都唔想局限自己。」隨着兩年前的決定，吳景聰的拳手造型照，不時出現在大型國際性賽事的宣傳海報上。
背紋佛像祈求佳績
講得出、做得到，吳景聰近兩年亦不負眾望，昆侖決泰拳洲際拳王、IPCC亞洲金腰帶、M.H.C 國際泰拳爭霸賽金腰帶，以及終極傳奇澳門站4人淘汰賽中國金腰帶等等，一律成為了他的頭銜，但吳景聰仍然未滿足，希望在退役之前，可以挑戰更多世界級拳手，為的就是引證一下自己的實力，他說：「好似今次『YOKKAO 25&26』，對手係醒猜嘅入室弟子，實力肯定有番咁上下，加上賽事好多地方都會睇到，令我有機會可以喺世界面前展示自己嘅實力，我目標就係咁簡單。」
兩年前開始在背脊紋上佛像，祈求成績好、人緣好的吳景聰，為了應付即將來臨的硬仗，平均日操5小時，風雨不改。可有感到辛苦？吳景聰不消考慮便答道：「唔係我覺唔覺得辛苦，根本喺香港打泰拳就係好辛苦！喺泰國，拳手食完就瞓，但我哋食完仲要去教，政府有冇資助？哈！哈！總之現階段好多嘢都仲係要靠自己或者拳館嘅支持，我唔會去同其他職業運動員比較，因為大家好多條件都唔同，但有樣嘢係一樣嘅，就係我哋都好需要大家嘅支持！」
圖/文：戴陶蔚
（部分相片由受訪者提供）