從泰拳尋找滿足感林博敏 挑戰自我極限
「台上一分鐘，台下十年功」縱是老生常談，卻屬無數運動員的寫照。「YOKKAO 25&26」泰拳賽將於本月11日假九龍灣國際展貿中心舉行，兩名本地著名拳手林博敏（Billy）和吳景聰，將藉主場之利，分別挑戰泰國殿堂級拳手醒猜（Saenchai）的入室弟子Ehran和育猜（Yodchai）。Billy和吳景聰自備戰以來，每日都苦練5至6小時，嚴格控制飲食過着非人生活，除為了超越自我，追求更高層次外，最希望「在擂台上贏得大家的喝采和掌聲」！
在加拿大讀書期間，體重接近200磅的Billy，雖然是運動狂熱分子，足球、美式足球、欖球和曲棍球等「無撞不歡」，卻從沒有想過會學泰拳、上擂台。「讀書嗰時真係冇諗過會打泰拳，因為喺加拿大讀書嗰陣成日班Friend出去玩，又煙又酒，好肥，口腫面腫，所以一返嚟香港，爸爸就叫我去ATMA跟師傅學泰拳，講真嗰時堅只係想減肥，完全冇諗過打到依家仲打緊。」7年後的今天，泰拳已完全進佔了Billy的生活，不用比賽的日子，就在ATMA擔任教練。
「教班除咗係我嘅工作，仲畀到我滿足感，好多學員參與泰拳嘅目的，都同我當初一樣係為咗減肥，當我見到佢哋可以突破自己，我就會有好大滿足感。」那麼身為拳手時，滿足感又何來呢？「上得擂台個個都想贏！嗰陣我學咗幾個月就參加館內賽都係咁諗，不過耐咗就會明白，輸冇人想亦唔會開心，但要識得從中學習，知道自己輸喺邊，爬得番起身，咁先可以去另一個層次，升到Level就會有好大滿足感。」Billy由加拿大返港後，從事過不同職業，更曾涉足過娛樂圈，但最終選擇以泰拳為職業。「泰拳令我可以搵到自己嘅位置，喺擂台上嘅10分鐘，全部焦點都喺晒我度，嗰種感覺唔係份份工都可以畀到我。」Billy笑說。
打爆眼角 勇者無懼
9月11日「YOKKAO 25&26」泰拳賽當晚，乃Billy泰拳生涯以來第2次與海外拳手對戰，儘管第1次要「眼角縫12針」收場，亦無損Billy今次自我挑戰之決心，他謂：「我差唔多24歲先起步，嚟緊我32歲喇，好想喺退役前睇吓自己可以去到邊個層次，希望大家可以支持我！」
圖/文：戴陶蔚
（部分相片由受訪者提供）