馮嘉豪馮嘉浚爛命換勝利

哥哥「嘉豪」現正就讀教大體育教育的五年制課程，他坦言因為成績欠佳才修讀此科：「中學成績一般，老師話有高級文憑讀都執到，結果會考得幾分，經朋友介紹讀副學士，再升讀教院學位，兩年後大學畢業。」從學業上被人看低，到最後令人刮目相看，嘉豪的經歷正好譜寫出教大今屆賽事的旅程。至於弟弟「嘉浚」亦跟隨哥哥的步伐升學，不過他未能如願升讀學士學位，副學士畢業的他決定來年休學投身社會，希望下年再報讀教大回歸球隊，因此今場決賽將成為他的暫別戰。

哥哥曾「玩火」被捕

形容他們是「爛命兄弟」不只因兩兄弟學業成績一般，嘉豪就透露年少時曾誤入歧途，是籃球拯救他的人生：「細個曾經學壞，屋企樓下有童黨，試過睇佢哋玩火柴燒垃圾桶畀警察拉咗，好彩最後冇事，之後體育老師就捉咗我喺學校打波，唔畀我出街玩學壞，所以係籃球改變咗我。」

放大圖片

放大圖片

至於嘉浚就有相反的經歷，他小時天才橫溢，但因為高傲自大，不討人喜歡：「以前喺街場又自大，唔聽人意見，試過有一年學界決賽畀人噓，畀觀眾鬧『唔好扮嘢啦！』，隊友又鬧『守波啦仲慶祝！』，連阿媽都問『點解你打波咁乞人憎？』」結果，他因為態度懶散，令球技苦無進步：「以前個人好Hea，練波啱啱準時到，原本有機會打甲二，但自己又懶錯失咗機會。細個同安家仲同期出身一齊練波，今日喺大專見到佢進步咗好多，又打過甲一、甲二比賽，其他人亦對佢好大期望，相反自己仲停留喺乙組。甚至乎細個1打1都贏阿哥，但依家竟然連1分都攞唔到，後悔點解以前唔練波，淨係喺屋企打機Hea。」

懶散弟弟入教大先覺醒

不過，加入教大籃球隊後，嘉浚終於覺悟了：「第一次校隊練波跑到嘔，又畀隊友撞到腦震盪，我話晒都打過港青，真係醜。」自此，他決定加倍努力，追回失去的時間：「依家目標明確咗，會勤力啲練波，性格都改變咗好多，多咗聽人意見，唔會再亂咁發脾氣。依家亦喺甲二球隊晉裕跟操，希望可以打番上去。」

而嘉豪亦希望在讀書時期發憤，球技更進一步：「想喺讀書時期再勁啲，上多個層次，始終教師工作工時長，畢業後好難抽時間練波，退步得好快，希望可以衝多兩年。自己想加盟甲一頭4隊，唔想目標淨係護級。我又唔係SUPER STAR，惟有靠勤力啲。冇話一定有回報，但至少試過唔會後悔！」

馮嘉豪、馮嘉浚這對「爛命兄弟」如今浪子回頭，在教大籃球隊重獲新生，帶領教大被人看低下一鳴驚人，他們用自己的故事打出這份「爛命精神」，球迷們又點可以唔撐呀！

圖/文：司徒子文、蘇子雋