喜見「前廠仔」重振雄風

日職直擊話咁快來到最後一日,雖然小記曾經去過菲律賓、馬來西亞、越南做其他體育賽事採訪,但喺今次日職直擊嘅過程中,仍然學到好多嘢及經歷難忘時刻。

兼顧即時新聞同報紙唔容易

首先係寫網上即時新聞及報紙嘅時間,尤其係比賽日時間緊湊,一定要分配得宜,否則事倍功半,如何將採訪返嚟嘅好料,分別喺on.cc東網同報紙呈現畀網民及讀者,與時間競賽,絕對非一件易事。表面上寥寥一百幾十字加幾張相嘅網上新聞,其實背後有好多人力物力支援先做到。

今次採訪最大焦點,無疑係新加盟神戶勝利船嘅前鋒普多斯基,因為小記係阿仙奴球迷,亦鍾意呢位「前廠仔」,甚至對主帥雲格棄用佢而耿耿於懷。今次小記唔單止能近距離採訪「王子」嘅訓練同比賽,更喺現場親眼睇住偶像喺日職首騷,省2粒重振雄風,呢啲經歷,真係有今生、冇來世。