日媒大讚 普多首騷拍住薜高
前晚日職神戶勝利船贏大宮松鼠3比1，新加盟嘅「王子」普多斯基梅開二度，賽後受到日本傳媒大讚特讚。小記買咗幾份當地報章，足球版頭條都離唔開普多斯基，其中《日刊體育》最誇張，除咗主角普多斯基，仲列出多名球星如薛高、連尼加、李安納度、龍格保、科蘭喺日職首騷嘅數據，只有入3粒嘅「白比利」薛高，比普多略勝一籌，可見「王子」已極速俘虜當地傳媒嘅心。不過小記所買嘅報章，只有《體育報知》嘅足球版係用彩色印刷，其餘都係黑白，相反棒球大部分用彩色兼喺體育頭版，看來足球喺日本嘅地位仍未及棒球。
漫畫波砵唔及「溫暖牌」
普多斯基在對大宮松鼠嘅賽前，喺社交網上載咗張《足球小將》主角戴志偉嘅右波砵、小志強嘅左波砵兼護脛。查實佢3年前已獲得呢對「3間牌」波砵，但冇乜機會着嚟比賽，來到日職首騷終於大派用場，呢場佢喺上半場就着住比賽，不過表現一般。而不為人知嘅係，易邊後普多斯基換咗對印有太太名字Monika嘅「溫暖牌」白砵仔，立即發威省2粒，賽後「王子」表示，若果冇Monika嘅支持，佢係唔會來日本搵食，聽老婆話果然有運行。