「美斯上身」逼和天鵝 烏達卡救駕 冧爆東京fans

今場係FC東京隊長高萩洋次郎第200場日職上陣，開波前特別為佢舉行獻花儀式，主場氣氛非常熾熱，球迷開着手機「電筒」揮動，仲大唱「You'll never walk alone」，場面堅壯觀。不過，卻由客軍新潟天鵝開紀錄，踢到12分鐘，天鵝前鋒朗尼巴布沙開出罰球，泰亞高加夏度近門頂入。

FC東京立即發動猛烈反擊，可惜中島翔哉勁射中柱，隊友彼得烏達卡補中卻被判越位在先食詐胡，呢位今季新加盟嘅尼日利亞射手之後浪射兼連番失機，一度令球迷好失望。事實上，新潟天鵝防守相當穩陣，上半場成功保住1比0優勢。

太早失波影響部署 教練致歉

易邊後FC東京終於「嚟料」，攻勢愈嚟愈入肉，原本表現低沉嘅彼得烏達卡，踢到66分鐘突然發威，由左路突破殺入中路射門，省中對手改變方向入波，扳平1比1，令人拍爛手掌。FC東京原本有反勝良機，但室屋成近門頭槌攻門，被天鵝守將擋出，最終雙方打和1比1。

賽後FC東京教練篠田善之喺記招耍冧：「我哋令球迷失望。因為太想全取3分卻未能成功，並且被對手先入一球。我哋太早失球，被打亂節奏。其實我哋應該可入兩、三粒，但埋門一腳唔夠冷靜，故有改善空間，我哋會深切反省。」天鵝教練呂比須則對球隊能全身而回表示滿意：「雖然經過3周休息，不過我哋狀態仍然唔錯，而且戰鬥心極強。所以很高興可以搶到1分。」

彼得烏達卡（右）勁抽破網，為ＦＣ東京搶番1分。	今場係高萩洋次郎（後排右二）第200戰，賽前獲球會獻花致謝。	FC東京（紅藍衫）求勝心切，同天鵝鬥到飛沙劈石。

袁志浩日本直擊