梁氏兄弟各為其主難為爹哋
重投香港飛馬的梁諾恆，來季將首次在職業生涯與哥哥梁冠聰分道揚鑣。「大佬」較早前更在Facebook留言來季雙方碰面不會留手，兄弟同心的「細佬」亦講明：「我都唔會讓佢，希望為球隊奪得一至兩個錦標，以及入選香港隊。」
梁諾恆：家人唔知着咩波衫好
從英國回流香港展開職業生涯，梁氏兄弟之前從未試過各為其主，「細佬」梁諾恆坦言不習慣：「不但指球場上，喺日常生活中，以前大家時間表一樣，見面時間比較多，可隨時談天說地。」雖各自發展，但「細佬」認為兄弟情不變：「感覺有如當年去英國學習，或者大家見面時間不多，但一碰面就傾大半日，分開發展未必是壞事。」
在綠茵場上跟哥哥對壘，「細佬」依然專業：「做球員要有專業精神，即使對手係爸爸都要盡力踢。」談及家人，「細佬」笑言：「爹哋媽咪就難做啲，都唔知着邊件波衫好。」