新隊長「陳7」撐起香港飛馬！
新季將由楊正光執教的港超球隊香港飛馬，昨日於京士柏運動場正式開操，球隊3位歐洲新援亦首次亮相，不過焦點則落在來季將穿回7號球衣並獲委任為隊長的陳肇麒身上。「陳7」坦言無懼輿論壓力，決心率領球隊爭取佳績，更揚言自己攞正牌跟球證拗數！
今夏球隊人腳變動不少的香港飛馬，新兵除了早前已落實的艾華、梁諾恆、梁興傑、高俊及羅曉聰外，其餘3位新援包括前俄乙保加利亞中堅羅斯、去季於塞浦路斯搵食的前西丙中場迪比，以及去季在馬其頓甲組聯賽射手榜排次席的塞爾維亞前鋒伊高，亦於昨日開操首次正式亮相。至於舊援方面，除利馬之外，基斯贊、沙華、艾華度及迪亞高等因踢法不適合球隊不獲續用。上季由「陳7」搖身一變「陳18」的陳肇麒，來季將重披7號戰衣，更獲委任為香港飛馬隊長，黃俊皓及胡晉銘則出任副隊長。
多年來都選擇7號作為球衣號碼的陳肇麒，在7號波衫前主人迪亞高離隊後，主動向球會要求改着7號。陳肇麒笑言：「多年來，7號都帶畀我好多運氣，好多成就都係着上7號時獲得。」不過「陳7」仍以球隊為先：「其實自己出道時都係着18號，着咩號碼都好，最緊要球隊能夠配合。」
「輿論壓力？有咩好怕」
新球季擔任隊長，「陳7」肩負重任：「球會希望我帶領隊中如林樂勤、蕭俊銘等年輕小將成長，畢竟球會對佢哋嘅期望都好大。」「陳7」仲話：「做咗隊長攞正牌同球證拗數！」問到多年來一直是球壇風雲人物，會否擔心升任隊長惹球迷批評時，「陳7」就表示：「都咁多年，怕咩呀？唔會怕任何嘢！球迷鍾意我就鍾意我，唔鍾意我就唔鍾意我，我只有做好自己令人鍾意我！」
香港飛馬將於8月7日至19日期間前往泰國清邁和曼谷集訓，屆時將會與春武里、武里南、泰軍以及其他當地球隊進行熱身賽。