勝利船主場有條星光大道
神戶勝利船主場御崎公園競技場，位於兵庫縣神戶市，可容納3萬人，喺場外有條「星光大道」，好似三浦知良、本田圭佑、大久保嘉人等日本球星，都有留低「腳印」。記者入到球場，先有小型博物館，唔單止展出勝利船歷來嘅主客波衫，由於2002年世界盃16強巴西贏比利時2比0之役，就喺呢個球場比賽，亦騷出2隊球員嘅簽名波衫，包括「大哨」朗拿度，仲有一塊貼上一班官方應援團美女相嘅展板，都幾吸睛。
呢個球場設有天幕，落雨嗰陣可以閂埋，記者見到場邊有多部大風扇狂開，球隊公關稱球場保養得好，陽光、風同水不可或缺，但因為有時需閂埋天幕，影響草地質素，所以要開行大風扇。由於其草地質素欠佳，勝利船打算由2018年開始，改用好多歐洲球會選用、由天然草混合人造纖維草嘅「hybrid grass」，近日亦已獲日職賽會同意，令御崎公園競技場將會成為首座使用呢種技術嘅日職球隊主場。
VIP樓層設「碧咸椅」
去到VIP樓層，位處中間睇波一流，如果持有VIP波飛，比賽當日可任食球場提供嘅美食，而喺角落放咗個碧咸紙板同1張座椅，原來張椅係「咸爺」15年前坐過，絕對係打卡位，不過唔會畀其他人坐。
球場資料
座位：30,132
啟用日期：2001年10月
興建費用：230億日圓