走訪FC東京「尼日利亞張飛」搞笑有一手
「尼日利亞張飛」變身FC東京「喜劇之王」！嚟到日本直擊第5日，記者一早就去睇FC東京訓練，但唔見王牌射手大久保嘉人，難免有啲失望，據報佢係因感冒缺操，未知會否影響周日對新潟天鵝披甲。因此喺收操後，記者即刻捉住另一前鋒彼得烏達卡傾兩句。
呢位上季與神戶勝利船前鋒李安度蒙迪拉並列日職神射手嘅箭頭，由於外貌粗獷滿面鬍鬚，以往喺中超搵食被稱為「尼日利亞張飛」，原來佢都知道自己呢個「花名」，仲話：「我喺FC東京仲畀人叫喜劇之王添！」唔通佢係「爛gag王」？
比較中超同日職嘅分別，烏達卡坦言：「中超進攻經常單對單自己搞掂，而日職則着重整體合作。」嚟緊日職對新潟天鵝，烏達卡就提前畀料：「FC東京會贏2比1，我有冇信心入波？我一定會入波。」最後，佢仲擺出Chok甫士，用英文及日文同記者講：「午安，我係彼得烏達卡，再見。」又幾玩得喎！
高萩洋次郎做老竇唔染金毛
至於曾外流澳職同韓職嘅隊友高萩洋次郎，認為兩地與日職嘅水準接近，不過日職水準高啲啲，但佢話：「外流嘅經歷，令我防守意識強咗，對我打防中係有幫助。」以往一頭金髮型爆嘅金萩洋次郎，點解依家染番黑，佢會心微笑話：「因為做咗爸爸，應該要斯文啲做個好榜樣。」不過隊友森重真人證實因左腓骨筋腱脫臼要做手術，需養傷4個月，認真慘情。