愈遺憾愈值錢？ 三浦93年波衫盛惠3千

講到日本足球古着店，不得不提Vintage Sports football（VS），記者尋日嚟到位於東京涉谷區嘅分店。呢間VS麻雀雖小，但五臟俱全，有新有舊，但大部分都係古着，貼窗嘅全屬日職或日本國家隊波衫，其餘係外國球隊，店員稱最受歡迎嘅係日本國家隊波衫，包括93年嘅三浦知良同98年嘅中田英壽球衣，全店最貴亦都係三浦嗰件，要成42,999日圓（約3,015港元），始終日本人未忘當年佢身披此戰衣，喺世界盃外圍賽尾仗完場前30秒被伊拉克逼和2比2，爭取首次殺入世盃決賽周功敗垂成，三浦未能一圓世盃夢，亦令呢件波衫增添一份缺憾美。