柏雷素爾小巨人日職最矮 中川寬斗：重心低仲好波

中川寬斗（左）、橋口拓哉

來到日本直擊第4日，記者造訪現時排喺日職第4位嘅柏雷素爾，雖然名義上係閉門練習，但亦可以喺場邊影相。今次焦點落喺22歲中場中川寬斗，呢位身高1米55嘅現時日職最矮球員，比練射罰球嘅「假人牆」矮成個頭，但你咪理，佢表現落力，射波仲腳腳七注，收操後仲同兩個隊友跑步加操，勤力抵讚。

主帥講目標：拎亞冠入場券

中川寬斗受訪時，第一句就話：「我唔覺得自己矮。」堅有霸氣。佢坦言初初唔係特別鍾意足球，但因為兩個哥哥踢開波，心諗佢哋得點解自己唔得，呢份鬥心就成為咗佢克服重重障礙成為足球員嘅動力。中川視前巴塞中場沙維為偶像，佢好佩服同樣個子唔高嘅沙維，可憑技術及足球智慧主導比賽，中川強調：「我重心低鍾意扭波過人，高大球員靈活度低，往往扭贏佢哋。」中川話冇乜特別嘅目標，只想努力為柏雷素爾爭勝，非常踏實。

矮「假人牆」成個頭

細貝萌（左）絕對係大人細路都鍾意。

柏雷素爾主帥下平隆宏，大讚中川技術好速度快之餘，踢法又聰明，識得避重就輕發揮所長，前途無限。講到今季目標，下平隆宏就話希望拎到下屆亞冠入場券。

袁志浩日本直擊