歎完佐敦燒豬到中環劈酒 李斯特城醉住離港

李城喪玩全程追
周日12:00am 佐敦大歎燒豬

岡崎慎司神情呆滯上飛機

李斯特城前晚踢完決賽後，拉隊到九龍佐敦18廣場嘅「新斗記」，燒味師傅準備好燒豬恭候。食飽燒豬仲有下文，約凌晨兩點由泰國老闆維猜帶隊，到訪中環太子大廈25樓嘅Sevva玩樂，維猜仲帶咗一大團泰國人前來聚會，玩到凌晨5點幾先返酒店，本報記者更影到卡斯柏舒米高同占美華迪兩位當家球星面紅紅，仲大聲講嘢，明顯飲咗唔少。有入住酒店追星嘅粉絲透露，真禾特亦勁醉大吵大鬧，好彩有職員及時帶佢走，馬克艾拜頓都要人扶住行，日本前鋒岡崎慎司昨午去機場期間更神情呆滯，連隊長韋斯摩根都問佢咩事，岡崎慎司老實答飲得太多，睇嚟真係要好好休息。

至於冠軍利物浦捧盃後，隨即坐凌晨機離港，有超過100名球迷喺機場守候，盡最後努力攞簽名同合照，穆罕默德沙拿仍然有求必應，隊長佐敦軒達臣亦不時揮手道別。有女粉絲想搵菲臘比古天奴「集郵」，但搵極都唔見人，同行友人話佢太矮細好易走漏眼，唔知古天奴聽到有咩感覺呢。

周日2:00am 轉到中環暢飲	周日5:00am 面紅紅返酒店 「華Dee」（左）等人飲到面紅紅離開Sevva返酒店。	周日12:00pm 呆樣上機走人 岡崎慎司（左）到機場時仍然「好呆」。

• 最後「餐士」
  利物浦前晚踢完決賽後離港，粉絲把握最後機會見偶像，穆罕默德沙拿（右二）繼續有求必應。

圖/文：黃兆崑