表演賽滿載笑聲 亨特利 韋德過料畀安儀
「桌球王帝」亨特利盡顯功架，贏走表演賽冠軍！貴為7屆世界冠軍的亨特利，昨日與「白旋風」韋德及香港「四眼Cue后」吳安儀進行表演賽，採用80年代經典的Round-robin賽制，由3位球手輪流對戰，每輪雙方交手兩局，以總度數分出勝負。「安儀」首先出場與韋德較技，有父母及男友撐場的「安儀」曾將白、黑波Set近球枱兩邊，韋德就兩度嘗試利用dup波打入，功架十足睇到球迷拍爛手掌。「安儀」最終先後不敵韋德及亨特利，但表現獲讚賞，兩位傳奇球手亦有提點安儀，她認為對自己參加男子賽事大有幫助。
亨特利讚觀眾夠投入
至於壓軸一場就成為球迷最期待的畫面，亨特利激戰韋德為現場掀起高潮，兩位老友落場毫不留手，互相做出精彩防守，出手力度及擊球線路都令觀眾非常回味，足見兩人寶刀未老！比賽尾段韋德一度「自己Set自己」，更搞笑地扮嬲作勢折斷球桿，亨特利則在背後偷笑，令現場充滿笑聲！最後表演賽由亨特利贏出，在歡呼聲中捧起獎盃，他大讚現場氣氛：「呢度嘅氣氛同其他地方好唔同，個個都好投入，喺度打波亦令我諗起舊時，香港係我世界上最鍾意嘅地方之一，希望未來可以再來港打波！」
