奧蘇建議香港搞世巡賽
「火箭」奧蘇里雲深受廣大球迷歡迎，這位話題性十足的桌球名將參加「香港世界桌球大師賽」前，昨特別抽空接受本報專訪，球風快如「火箭」的他竟指背後秘密是靠直覺；更表示無興趣睇4支訪港的英超球隊比賽，貫徹其寸爆風格。而昨晚奧蘇現身九龍城東亞桌球中心與「白旋風」韋德練習，惹來球迷蜂擁而至，爭相把握機會親睹「火箭」的風采。
天才打147靠直覺
奧蘇給大家「有性格」及「難捉摸」的印象，但這位5奪世錦賽冠軍的名將昨日受訪時心情勁靚，有問必答外全程亦表情多多。「火箭」打波出名夠快，1997年世錦賽時只用了5分20秒就打出「147」的紀錄至今仍無人能破，這經典畫面可算是桌球界最佳教材，不過他對於「快」的秘密卻冷淡回應：「我都唔知點解打得咁快，靠嘅只係直覺。我覺得你愈諗得耐，就愈多問題發生，所以我見波就打，冇諗咁多。」「火箭」在桌球界曾引起無數話題，包括認為「147」獎金太低，在清枱時轉打粉紅波打146度。會否再玩嘢？他笑指打147其實好難，打出146度已算不錯，真係「冇佢符」。
「火箭」總是球迷們的最愛，舉手投足都成為焦點，對於成為桌球界的「萬人迷」，他希望用表現回應：「我同球迷關係非常好，感謝佢哋愛戴，希望今次比賽可以打好波畀香港球迷睇。」做桌壇巨星肯定有壓力，奧蘇早前就因此入院，不過現在已視壓力為推動力：「要有成績就需要壓力推動，依家我學識享受；雖然仲想贏冠軍，但唔會再畀自己太大壓力。」
10年後再度訪港，奧蘇對香港仍有讚冇彈，更期望香港可成為世界巡迴賽的其中一站，好讓自己有機會多吃點心。雖然4支英超球隊同時來港參加英超亞洲盃，但寸爆的奧蘇一於懶理：「我最鍾意係錫周三，其他球隊都唔係踢得咁好，我冇興趣睇，除非美斯踢啦，否則我寧願去煮吓嘢食！」短短10多分鐘的訪問，奧蘇已爆出不少金句，亦是球迷鍾愛這位桌壇天才的原因。