東方龍獅乘勇追擊永倫
甲一聯賽季後賽4強終極一戰，東方龍獅、永倫今季惡鬥連場，今晚在修頓上演「藍、黃」最重要的Game 3賽事，究竟是「藍軍」成功翻盤，連續兩年殺入總決賽，抑或「黃金戰士」掃走死敵，重奪失落一年的總決賽資格，今晚8時大戰一觸即發，球迷誓必坐爆修頓見證這場最激對決！
本地籃壇「Big3」交鋒一向是球迷焦點，南華上周已經以兩連勝擊敗標準福建，率先殺入總決賽。東方龍獅與永倫則在四強總場數打成1比1平手，在3場2勝制下，今晚再決高下定生死。「藍軍」自開季經歷ABL至今，球員進步十分明顯，但由9月開始應付頻密賽程，難免會「跌Watt」，主將李琪就有一套調整方法：「如果比賽時手感欠佳，就去多做防守，在其他方面協助球隊。場外做gym和練射波當然不能少，自己亦會多睇賽事錄影，留意細微位置，盡量在下一場比賽前做好準備。」
阿Ga紮住上要嘜死泰那
除了李琪，另一要員方誠義（阿Ga）同樣在G2回勇，雖然右手手肘仍未100%復原，為了再次打入總決賽，「阿Ga」坦言今仗一樣會搏到盡：「進入最關鍵時刻，就算帶傷一樣要盡力去衝！上仗泰那表現失色，但今場相信他一定會出盡全力，所以要加緊防守泰那！」
東方龍獅眾將決心求勝，永倫同樣不輸蝕，上仗黃鎮煒同樣表現回勇，交出10分、7籃板，連入2球三分波更令全場「永粉」High爆！雖然最終不敵對手，但賽後球隊經過詳細檢討，對今晚賽事亦準備就緒：「東方外線表現不錯，最主要阻止他們拉出空位起手。另外，在防守方面壓力要加強，自己會做好搶籃板工作，亦希望可以協助隊友溝通。」