實現3連霸梁文博啜爆小丁
丁俊暉、梁文博於主場打出水準，戲劇性代表中國反勝英格蘭，連續3屆贏得桌球世界盃！決賽繼續打7局4勝制，中國曾經一度落後局數1比3，好彩之後小丁力挽狂瀾，接連2次擊敗卓林普，最終中國反勝4比3奪標。賽後梁文博自知冇小丁發揮得咁好，所以捧盃時候作狀勁咀小丁，場面搞笑。
今次世界盃於中國無錫舉行，首局梁文博不敵卓林普，但次局丁俊暉擊敗鶴健士扳平比數。不過隨後的雙打以及梁文博於單打再次落敗，當時英格蘭只要多贏一局就可捧盃。但中國有小丁撐住，佢先頂住壓力打出一Cue70度砌低卓林普，緊接贏出雙打追成局數3比3要打決勝局。丁俊暉再戰卓林普，雙方開局不斷防守，但因卓林普出現失誤，小丁把握機會打出一Cue59度，最後小丁贏88比4，帶領中國反勝捧盃。
決勝局Pot贏卓林普
梁文博今次有分參與的4局賽事輸掉3局，中國可以贏出小丁功勞絕對最大，所以梁文博賽後「錫晒」丁俊暉呢個好兄弟。小丁表示，於主場出戰令佢戰意大增，鬥至決勝局再對卓林普打得更有信心：「對賽往績我比較優勝，所以打得好放，最後都順利贏出。」2011年，丁梁配已曾為中國稱霸世界，之後2015年由周躍龍及顏炳濤衞冕成功，到今年小丁及梁文博再下一城，為中國完成世界盃3連霸。