大細路普巴朝拜「星戰」
曼聯天價巨星保羅普巴昨日下午離開香港之前，特別抽時間去迪士尼樂園玩番轉，皆因佢想見一見《星球大戰》人物及超級英雄Iron man。事實上，保羅普巴係星戰迷，之前試過將件衫同頸巾過頭笠，似足《星球大戰》絕地武士Obi-Wan Kenobi，難怪今次訪港百忙之中，都要會一會科幻世界各路英雄，為亞洲之旅畫上完美句號。
玩轉Iron man極速穿梭
雖然普巴前晚深夜先至返酒店，但昨日朝早好精神，同朋友及保鏢一行人，成支車隊殺入迪士尼。呢位法國國腳同一般大男孩一樣，都係比較鍾意樂園嘅科幻人物，全程主要留喺「明日世界」遊樂園區，包括玩鐵甲奇俠飛行之旅，同埋星戰極速穿梭，之後一副滿足樣前往機場坐私人飛機離開香港。
保羅普巴今次訪港之行勁受歡迎，前晚同贊助商及友好到北京道1號食晚飯兼欣賞夜景，由晚上8時半逗留至午夜12時，當時酒店門外仍有10多名球迷癡癡地等，普巴亦好識做，落車後走到球迷區幫球迷簽名，保證個個都有先至返房休息，大家開心。