港隊爭氣送別陳偉豪

港隊踢出爭氣波,送別一代鐵血隊長陳偉豪!港隊昨晚主場0比0賽和國際排名109位的約旦,第65次、亦是最後一次代表港隊的陳偉豪於73分鐘後備登場,助港隊力保清白身。總教練金判坤賽後率領全軍列隊致敬,笑言已「夠喉」的「偉豪」期望延續球迷睇波意慾,不論改朝換代亦要繼續支持香港足球!

在天文台發出酷熱警告下,港隊昨晚獲2,742名球迷捧場。主帥金判坤正選陣容排出4-3-3陣式,「主角」陳偉豪先任後備。 港隊曾於3月作客淨吞約旦4蛋,但今仗表現並不輸蝕,麥基更頻頻利用速度力壓對手,而在15分鐘,全場球迷為身穿15號球衣的陳偉豪起立鼓掌致意。戰至44分鐘港隊憑一次罰球攻勢將皮球送入網窩,惜艾里奧的入球被球證指犯規在先無效,半場打和0比0。賽事到73分鐘陳偉豪後備入替羅拔圖,並由葉鴻輝替其戴上隊長臂章,在球迷熱烈掌聲和歡呼下步入球場,當他觸球時更令全場起哄,而「偉豪」亦成功解圍兩次,為港隊力保清白身。

感激隊友帶來完美回憶

「Kim Sir」賽後率領全軍歡送這位鐵血隊長,並由偉豪長子景堯向爸爸獻花送驚喜。向來「把口唔停」的偉豪臨別感言亦不忘搞笑:「做球員永遠唔知下場比賽係幾時,今場比賽係我最享受同最珍惜,因為知道唔係自己踢先。喺度特別多謝一班隊友踢出一場精采比賽,唔知係咪因為我嘅關係好搏,好似李志豪、林嘉緯及盧均宜;仲有後期嘅葉鴻輝,我哋一齊經歷過唔少大小戰役,冇咗你哋,我嘅港隊回憶一定冇咁完美。今日有呢個儀式,唔代表我嘅地位比大家高,只係我年紀大啲,要行先一步。」

此刻偉豪難掩感性,呼籲球迷繼續支持香港足球員:「喺呢個時候離開係最適合,見到唔少有質素嘅年輕球員,大家都係用青春為港隊效力,每位都係願意為港隊犧牲嘅英雄。特別感謝球迷為我搵番唔少香港隊紀錄,仲有第15分鐘嘅掌聲,雖然只係1分鐘,但係係我用17年堆砌得嚟。」

港隊下周二撼北韓送上祝福

陳偉豪於18歲首度代表港隊作客阿聯酋打和1比1,最後一戰再遇西亞球隊力保和局,他坦言結局圓滿。被問到73分鐘才上陣會否不夠,他笑言:「夠晒架喇,始終而家體能要應付高強度比賽會吃力。阿Kim今日原本比我踢耐啲,但我見隊友踢得咁好,無謂打搞。」港隊將於下周二的亞洲盃外圍賽主場鬥北韓,偉豪送上祝福:「以往我踢港隊對北韓有唔錯紀錄,港隊一向遇強愈強,Kim Sir,Sure Win!」