咖喱仔玩謝占士贏Game2

雖然勇士喺比賽初段出現好多失誤，但史堤芬居里仍交出32分、10個籃板同11次助攻嘅「3雙」數據，杜蘭特一樣弗爆攻入33分、13個籃板同6次助攻，慶祝教練卡爾克服背傷復出親自領軍，當中「咖喱仔」喺第1節射入10個罰球追平總決賽單節紀錄，仲喺第3節神奇地搶到7個籃板。

躁底大帝鬧記者白癡

另一方面，勒邦占士有29分、11個籃板同14次助攻，艾榮有19分、2個籃板同7次助攻，路夫有27分同7個籃板，不過占士喺防守上延續Game1嘅不濟，試過喺單對單情況下，被史堤芬居里玩到氹氹轉上籃搶分，成為傳媒同球迷繼續恥笑「大帝」嘅把柄。

咁都未止，史堤芬居里喺第4節見勇士大比數領先，輕鬆到用毛巾遮面瞓喺球場地板養神，反而占士賽後被記者問到Game3返主場係咪要搏命，佢嬲到話人問埋啲白癡問題，而且留喺更衣室受訪算數，拒絕出席記者會，證明心情已跌落谷底。