隊友篇：李志豪 陳肇麒好兄弟
代表港隊出戰，從來也是「輸少當贏」，皇馬訪港坐爆大球場，主場出擊的港隊卻被噓爆。無論是昔日負責「執波擔水」的「掹車邊」新丁，還是臨別在即的老大哥，偉豪仍對港隊戰衣甘之如飴，除了使命感，還有更重要的兄弟情。「15歲踢青年軍已經同李志豪並肩作戰，大家一個眼神已經心領神會。不過細個時候血氣方剛，試過喺港隊幫隊友出頭被逐出隊；仲有大眼仔（黃展鴻）當年喺屋邨帶我踢波、肇麒就由壞孩子變成熟，呢份出生入死兄弟情，先係最難忘。」
寄語新生代頂住壓力
港隊過去10年仍是由「雙豪」撐起防線，接班人仍寥寥可數，偉豪寄語「畀啲時間」：「如果講足球知識，依家呢代比我哋更豐富，後衞講求用波，唔似以前只踢爛仔波，好似徐宏傑同胡晉銘都好聰明，梁諾恆亦有身形，只係踢南華唔係你有能力就踢到，仲要識得去應付壓力，唔可以單單用一、兩場表現去衡量。」
