騎士喺NBA季後賽東岸決賽主場以108比111不敵塞爾特人，一度領先21分之下斷送好局，在7場4勝制賽事被綠軍追成1比2，而且勒邦占士今仗嚴重失準僅得11分，包括第4節「捧蛋」。賽後占士嬲到出面，當有記者問佢點解打到咁差，佢竟然失控狂鬧人！
雖然騎士連續兩場大炒塞爾特人，對手又有主將「小巨人」湯馬士因傷缺陣，不過即使路夫有28分、10個籃板同3次助攻，艾榮得29分、2個籃板同7次助攻，最後依然因為勒邦占士得11分、6個籃板同6次助攻，搞到被塞爾特人完場前射入絕殺三分波完場。
其實綠軍今仗大部分時間落後，只係第4節尾段逆轉領先咗187秒，但可能騎士對上兩場贏得太容易，放棄主攻內線狂射三分球累事，結果巴特利有20分、3個籃板同4次助攻，包括完場前0.1秒射3分「滴入」，協助塞爾特人贏番場。
今次係勒邦占士職業生涯中所效力嘅球隊於領先20分以上，首次遭遇逆轉吞敗，對上49次大幅領先全部贏波，難怪賽後佢嬲到扯晒火鬧記者：「我係打得唔好，你想我講乜嘢？你專門趁我輸波至開聲問，每次我哋輸波你就會出現，好奇怪，我記得你！」