輸波照攞MVP 37歲朱基：我仲踢得！
南華未能打破3年錦標荒，不過為「少林寺」建功追近比數的37歲老將朱兆基，賽後仍獲選為決賽最有價值球員。自言「仲踢得」的「朱基」拒絕言退，並寄語陣中小將把握時間證身價。
朱兆基下半季於南華教練狄恩靡下重獲正選，昨日除於69分鐘接應艾華右路傳中飛身為南華頂成1比2外，更於中場助攻助守，活力絲毫不像年屆37的沙場老將。「朱基」賽後獲囝囝畫上南華會徽鼓勵冧到爆，不過未能協助南華打破錦標荒，始終難掩失望：「南華今季走到呢一步，已經超乎預期，畢竟今季有唔少負面消息。我哋有能力再踢好啲，但對手有部署有系統，贏波都好正常。賽果對我嚟講係接受唔到，但大家已經搏到盡。」
南華難逃連續3年四大皆空宿命，不過昨日的拚搏表現，總算贏回不少球迷掌聲支持。「朱基」寄語陣中小將先做好自己：「唔好理其他人指指點點，邊個落場唔想贏？不過踢得強隊就唔可以畀時間走，一嚟到就要話畀人知你得，唔得就要畀人踢走。」37歲的「朱基」笑言已忘了是否首奪決賽MVP榮譽，但強調未是時候引退：「如果覺得37歲阻住其他人發展，不如睇我榜樣跟住去做。我仲想踢，除非冇人要。」
