不適離場係吉兆爵士鬥黑贏快艇
爵士昨日喺ＮＢＡ季後賽西岸首圈Game 4主場以105比98擊敗快艇，場數追成2比2，雖然希禾特因為食物中毒，下半場被迫退下火線，但傳媒同球迷反而發現，兩隊進行嘅4場季後賽，竟然係邊隊黑邊隊贏，希禾特離場反而成為爵士贏波吉兆呀！
上半場兩隊分數咬得好緊，但希禾特取得3分同2次助攻後，因為食物中毒身體不適第3節開始被收起，成為爵士逐漸拉開比數轉捩點，最後傷愈復出嘅高拔有15分、13個籃板同1次助攻，帶領爵士追平場數，基斯保羅有27分、9個籃板同12次助攻都救唔番快艇。
奇怪嘅係，Game 1爵士有高拔受傷被調走，最後贏到比賽，跟住Game 3快艇有格芬傷出兼收咧，結果又贏波，輪到Game 4爵士有希禾特食物中毒離場，離奇地又攞到勝仗，總之兩隊衰鬥衰，好似邊隊黑邊隊贏，球迷真係唔知好嬲定好笑。
潮韋連續三雙 雷霆照落後1:3
同日，雷霆喺西岸首圈主場以109比113不敵火箭，場數落後到１比３，韋斯布克取得35分、14個籃板同14次助攻，成為1967年嘅張伯倫後，聯盟史上第２個連續３場季後賽３雙球星，仲創出連續3場季後賽得分「30＋」新紀錄，可惜雷霆依然輸波。