贏多場搞掂 勇士靠居里逆轉拓荒者
勇士昨於NBA季後賽西岸首圈作客以119比113擊敗拓荒者，一度落後17分下完成逆轉，有望橫掃對手晉級。雖然勇士教練卡爾因病唔能夠親自領軍，不過史堤芬居里完場前「復活」，49秒連入9分，帶領勇士場數領先至3比0。
由於卡爾不適，勇士在助教米克布朗帶領下，上半場發揮未如理想，甚至一度落後17分，不過史堤芬居里有34分、4個籃板同8次助攻，奇利湯臣有24分同2個籃板，加上積蒙格連有9分、8個籃板同7次助攻，協助勇士連贏3場，咖喱仔更加射入5個3分波添！
馬克加素絕殺 灰熊追到2:2
其實居里上半場手感好差，不過他在完場前49秒突然「復活」，除了射入招牌3分外，還有中距離得手，並於關鍵時刻連入4個罰球，連拎9分協助球隊奠勝。相反，列拿特取得31分、7個籃板同4次助攻，依然救唔番拓荒者。
同日，灰熊於西岸首圈主場加時後以110比108險勝馬刺，場數追成2比2，馬克加素取得16分、12個籃板同4次助攻，包括加時完場前0.7秒，拋射得手絕殺對方，帶領灰熊燃起晉級希望。另一方面，李安納有43分、8個籃板同3次助攻，可惜幫唔到馬刺贏波。