杜蘭特復出 射瓜塘鵝

勇士主場以123比101輕取塘鵝,取得NBA今季最長的14連勝,不過對球迷最好嘅消息係,等咗咁耐杜蘭特終於復出!

「KD」杜蘭特今場第1球就即刻以「爆樽」攞分,明顯叫大家毋須擔心佢嘅傷勢,雖然上半場8射2中,但去到下半場就好返啲,最終全場得16分、10個籃板及6助攻,表現相當弗。至於勇士射手史提芬居里對太陽一戰撞傷左膝今場休戰,但勇士今仗全隊有7人得分達雙位數,足以彌補「咖喱仔」嘅缺陣。作客嘅塘鵝錄得4連敗,畢竟「一眉」安東尼戴維斯缺陣都球隊攻力大有影響,佐敦哥羅福攞到全隊最高22分,仍難逃大敗。

季後賽首圈火箭鬥雷霆

另一場快艇作客以98比87擊敗馬刺,鎖定西岸第5位,雷霆因而確認為第6種子,季後賽將會率先遇上火箭,意味占士夏登同韋斯布克兩位MVP大熱,將於季後賽首輪碰頭。「大鬍子」夏登今季交出生涯最佳數據,平均每場貢獻29.2分、11.2助攻及8.2籃板,至於韋斯布克數據更加恐怖,今季造出場均三雙的紀錄,火箭對雷霆呢個對碰,令季後賽更具觀賞性。