欖球美少女教睇波齊High
香港國際7人欖球賽今個星期五開打，為迎接這股全城欖球熱潮，各位趁還有時間就要盡快惡補一下。其實7欖於香港舉辦了幾十年，都市人不乏機會接觸，本地兩位欖球美少女王莉華（Lara）及彭曉藍（Mila），為大家上堂「7欖雞精班」，重溫玩7欖的技巧，齊齊做個臨時專家，睇波才夠投入！
現職體育用品售貨員的Lara學生時代接觸欖球，今季更進軍香港最頂級的女子超級聯賽，不過她成為職業欖球員夢想早就幻滅，只能在精神上支持香港女欖：「以前打欖球只係為興趣，但當欖球加入精英項目之後，我嘅夢想早就完結，因為以欖球為職業實在有太多承諾，犧牲太多其他嘢，所以我非常佩服香港男、女子隊成員，佢哋好值得香港市民尊敬，當然要支持佢哋。」
任何人都適合玩欖球
Mila是城大2年級學生，曾入選香港女子欖球U20，中學時代由田徑短跑轉項改打欖球，一打就上癮直至現在，她指出：「欖球吸引力在於任何人都可以參與，跑得快嘅可以打前鋒翼鋒，鍾意動腦筋嘅可以做指揮，體形健碩就專責攔截，總能搵到自己適合位置，各位球迷睇波睇得興起，不妨落場玩埋一份。」
大賽期帶旺相關行業
Lara指出，每年香港7欖俱能帶旺相關各行各業，體育用品都銷情激增：「我哋店舖喺7欖期間會有欖球擺設，亦有好多遊客專程嚟買波衫，生意十分好。」Mila在大學修讀文化遺產，並嘗試以學術角度研究7欖：「7欖係一種文化，場內嘅音樂令人情緒高漲，賽會喺臨近比賽前嘅宣傳鋪天蓋地，令人非常期待，因此我嘅大學功課亦會加入研究7欖這個題目。」
7欖周五開戰，Lara希望大家都要支持香港女欖，她說：「香港女子7欖近年進步好多，今年賽事改咗制，打入4強就有機會進軍大球場，呢個係難得機會，希望佢哋努力比賽，畀更多觀眾睇到香港女子7欖嘅表現。」Mila則以宏觀角度看香港7欖發展：「香港欖總近年增撥資源發展7欖，建立多支青少年隊伍，U20近年開始參加亞洲系列賽，成績不斷進步，希望香港代表隊愈變愈強，為港爭光！」
基本四式
傳球
7欖傳球並唔可以向前傳，向前傳係犯規嘅，一定要向後傳，由於個波係橢圓形，要傳得準最好就雙手捉實放在身旁，再由右至左發力掟出去。
鬥牛
如果個波從球員手中向前跌，或攻方出現輕微犯規，球證就會示意雙方球員做鬥牛，重新爭奪控球權。7欖鬥牛通常每邊3個球員，用肩膊推撞。
攔截
7欖係身體接觸頻繁嘅比賽，攔截動作亦好直接，就係攔截球員毋須掂到個波，而係直接向住控球球員撞過去，將對方成個攬跌，然後再搶波。
踢波
玩7欖唔可以向前掟，但踢就可以，不過由於個波係橢圓形，大腳送前難以預測個波彈地後嘅方向，而定點球同達陣後附加罰球，都係用腳踢。
王莉華
Lara年齡：24歲
現職：體育用品售貨員
球隊：康維他城市星光隊
彭曉藍Mila
年齡：21歲
現職：城市大學2年級學生
球隊：康維他城市星光隊