自由人為港育苗北望神州
唔繼續發夢，永遠唔會夢想成真！香港足球談青訓從來困難重重，出身於球市冰河時期的理文流浪後衞趙俊傑與蘇來強、溫裕雄等球圈老友毋忘初衷，合作成立自由人足球會育苗，提倡好波好品精神。今個球季在新任主席陳志超支持下，自由人除劍指丙組聯賽，還與一間中超球會「好事近」，有望結盟建立「一條龍」平台，讓港小將北望神州！
自由人足球會成立不足5年便在青年聯賽嶄露頭角，去季於賽馬會青少年足總盃U17組別，擊退傳統青訓豪門傑志捧盃，成一時佳話。曾擔任和富大埔領隊的陳志超，再與曾共事的趙俊傑及蘇來強結緣，雖然已有一段日子未有涉足香港球壇，仍被自由人的育苗理念吸引，出錢出力協助球隊。
趙俊傑信香港球員有優勢
說起投資球會與青訓之別，陳志超坦言後者更滿足：「成功嘅職業球隊應該係要帶嚟商業收益，但暫時喺香港好難做到，最開心係見到當日喺大埔合作過嘅教練同球員，得到大球會賞識，但始終為數唔多，反而青訓可作為跳板孕育更多小將追夢。自由人唔會拔尖揀晒最叻嘅球員，而係耐心發掘潛力，大家都喺公平起跑線上，呢樣係我最欣賞。」
自由人足球會今季有3支梯隊角逐足總青少年聯賽，除已申請競逐來季丙組聯賽，亦計劃與一間有港資背景的中超球會建立合作平台，為小將鋪下外闖路。陳志超透露：「全球足球聚焦內地市場屬大勢所趨，中超球隊有完善訓練基地，係唔少香港球員夢寐以求。相比起歐洲等地因工作證限制，中甲甚至中超畀到一個近啲、又實際啲嘅外闖舞台銜接，可以行到幾遠，就要靠球員自己努力。」
雖然香港足球的先天環境難及內地，趙俊傑深信香港球員也有過人之處：「該支中超球隊高層早前睇過我哋學員練波，盛讚佢哋技術唔錯，只係身體對抗性弱啲。香港小將場上轉數較靈活，而且我哋一向重視球品，及着重情緒控制，呢幾方面都係香港球員優勢。」要相信才會有希望，港足小將請繼續勇敢去飛！