東方龍獅練波 公安監場
東方龍獅昨日抵達廣州備戰作客廣州恒大的首場亞冠盃分組賽，儘管因「退飛」風波令這場球會級「中港大戰」氣氛再升溫，主帥陳婉婷強調未被影響，人氣高企的她更獲當地粉絲大讚靚女，繼續紅到去廣州。
東方龍獅抵埗後便拉隊往位於番禺的恒大青訓基地訓練，惟現場有不少公安、特警及便衣人員在場戒備，「保護」東方龍獅練波，增添緊張氣氛。不過一眾球員如常練足個半小時，在真草場下「去得更盡」。「牛丸」表示：「教練團早前曾因訓練場地遇上不少阻滯，但這個訓練場的質素尚算不錯，故即使早上便出發集合，球員依然能投入高強度訓練。」
捕獲牛丸粉絲讚靚女
而有廣州球迷更眼利認出曾列入健力士紀錄的「牛丸」，主動要求合照「集郵」，球迷王先生大讚她「真人靚過上鏡」，更睇好東方龍獅於周三晚有力搶分：「中超聯賽尚未開季，恒大狀態有機會Hea咗少少，如果東方戰術運用得當，牽制到佢哋幾個核心球員，贏波係難啲，但要和波唔係冇可能。」
本報記者廣州直擊