金句王教練跑出哲理
年屆60歲的馮華添（添Sir）退休後還「未夠皮」，繼續擔任多個長跑會教練，5年前更創辦馬拉松訓練中心，要以一個字形容這位馬拉松教練，相信「金」字最為貼切。訓練時身穿黃金色背心及金色跑鞋，成為添Sir獨有標記；學員成績又夠「金」，高徒賴學恩是本港馬拉松金牌選手，曾連續9年獲香港第1。而含金量最高的就是他的人生哲理，「馬拉松要跑42.195公里，但你唔行出第一步，又點會變成42.194！」滿口金句令學員袋錢入袋，「金句王教練」之名當之無愧！
由2002年成為馬拉松教練開始，添Sir在各大跑會的門生至今已超過1,000位。旗下傑出學員眾多，除賴學恩外，3屆渣打香港馬拉松女子冠軍黃小萍及2010亞錦賽女子銅牌得主周子雁亦屬添Sir愛將。不過添Sir並非只限於培養精英跑手，有教無類全因他相信「成功可以複製」：「我唔會揀學生，快同慢我都會教。既然視障如傷殘人士都得，點解你唔得？成功可以複製，只要你相信自己！」前金融界高層羅偉傑（Irving）就是被添Sir改造成功的例子，從體檢「滿江紅」到現在全數回復正常，他感激添Sir沒嫌棄自己又肥又差，令他身體重拾健康，成為他人生中最大成就。
理順呼吸 跑馬拉松當飯食
桃李滿門的添Sir有一套成功且有效的教學方法，信奉基督教的他笑言，「地獄式」訓練絕不符合自己風格，強調要跑得舒服，學員才有興趣繼續跑，最重要是掌握呼吸方法，利用呼吸節奏去配合步伐，自然可以「跑馬拉松當食飯」。馬拉松訓練中心的正統訓練講求規律，添Sir認為自律加上循序漸進，就是成功要訣，他更風趣地引用比喻：「就好似打工仔唔會突然擔心月尾老闆唔出糧，只要你做好自己本分，又點會無成績。成績就好似出糧一樣，只要你有做嘢，就有糧出。」
戰勝血癌 著書分享經歷
9年前添Sir不幸患上慢性血癌，接受過6次化療，他卻指這段痛苦經歷令他「多咗張刀」，可以利用經驗去幫助有需要人士。添Sir相信只要向前行，所有困難都會帶他走一條更好的路：「走向前嘅話唔好嘅嘢就會墮後，唔向前行就只會糾纏，42.195公里如果唔行出第一步，又點會變成42.194！有目標就要向前踏出第一步，逐步去縮短與終點嘅距離。只要唔停步，總會有出路；只要唔放棄，終點等待你！」癌症沒有令添Sir輕易放棄，反而領略出各種金句，學員一句傍身都終身受用。添Sir亦樂意分享人生哲理，曾撰寫《九十天練成馬拉松》及《42195•終點等待你》兩本著作，期望其馬拉松精神可助大家克服種種困難。
縱使已年屆花甲，添Sir仍未肯言休：「我喺一份有得退休嘅工退咗落嚟，搵到一份冇得退休嘅工作！可以教到最後一日係好有意義，我無諗過退落嚟，教馬拉松好似一個新開始咁，依家先係我人生嘅最高峰。」
文：袁志浩