聽朝激戰！超級碗堅有睇頭

布雷迪你一定要識

新英倫愛國者的四分衞布雷迪（Tom Brady），今屆希望用他的傳球帶領球隊奪標，成為首位5奪超級碗的球員，並力爭超越名宿蒙坦拿，歷史性4奪賽事MVP。現年39歲的布雷迪，去年季後賽因「漏氣門（Deflategate）」知情不報，今年常規賽被罰停賽4場，但仍無阻他帶領球隊殺入今屆超級碗賽事。

鐵帥爭勝不擇手段

雖然愛國者教頭比利切克，是NFL史上其中一位最出色的主帥，但他同時亦因不擇手段臭名遠播。現年64歲的他於2007年就因為錄影對手防守暗號而被罰，2015年季後賽又讓對手用不夠氣的橄欖球作賽而鬧出「漏氣門」。雖然比利切克堅稱自己清白，但外界一致認為這位教練才是一切爭議的始作俑者。

市道唔好？廣告費加少少

超級碗是美國最多人收看的直播賽事之一，所以各大品牌都會落重本做好廣告，讓家中睇波的球迷留下深刻印象。亦因如此，美國電視台亦趁火打劫，近年更達吸血程度，每30秒的廣告費由2010年的270萬美元，升到逾500萬美元！不過，未知是否市道麻麻，今年直播的霍士只是比去年「係咁易」加1萬，將價格定為每30秒502萬美元（約3,894萬港元）。

全國喪食12億隻雞翼

Super Bowl一年一次，美國人已視之為節日，亦習慣一家大細，親友聚首一堂睇波。睇波豈可欠缺小食？有報道指美國人於超級碗當日，食得最多的是雞翼，全國總共會食多達12.3億隻，並賣出多達5,170萬箱6支裝的啤酒。狂歡後遺症？就是約150萬人會於翌日「射波」不上班。