陳衍光低調發亮
如果說新界西居民是堅毅物種，每日由南港島穿梭新界西的九巴元朗守衞陳衍光，應算是鐵杵磨成針的最佳寫照：街波出身、沒有前期訓練，重傷過後又被教練質疑能力不足，26歲才首度入選香港……「B」隊。低調沉實的「光仔」，擁有嗟嘆命運的資格，他卻拒絕悲情：「我算係比上不足、比下有餘。有人覺得27、8歲仲踢『B隊』做乜，但我都係想代表香港啫。」苦等多年的南港島線列車終於通車，有心唔怕遲，老土，卻是硬道理。
港鐵南港島線上月通車，家住海怡半島的陳衍光依然提早3個小時起床，搭完港鐵轉乘九巴再搭輕鐵，終於到達九巴元朗慣常操練的天水圍天業路球場。「用咗咁多時間搭車，有時練完波反而唔想咁快走，寧願留低練多少少。」「光仔」的足球路不若車程迂迴，卻一如南港島人起步落後。17歲時多得時效流浪的蘇來強介紹加入青年軍受訓，除了街場模仿「C朗」的「原地插花」絕技，基本功全是由零開始。
比賽重創自比廢人
「好多球迷問我邊度出嚟，我都唔知點答好。當時流浪青年軍隊友已有一定根基，我就連『畀波走位』都唔識，第二年去到大埔，有『來強』同趙俊傑捉住我加操，夜晚仲去跑沙灘谷體能。可惜細個貪玩休息不足，比賽重創十字韌帶養傷8個月，當堂覺得自己好似廢人。」
所謂貪玩，原來竟是「掛住『鋤Dee』」……年輕總有放縱時，外表老實的「光仔」也不例外。翌年由新界東轉戰西邊加盟屯門，又被新帥擢升親信棄用，代替他的左閘人選，叫李明。信奉基督教的光仔，深信上帝早已預備：「跟住去咗公民經常同迪天奴、法圖斯等健碩外援埋身練波，我先至變得更硬淨。後來入選埋5人足球隊，教練曾偉忠要求整體戰術，唔似得以前踢街波個人化。」以為試煉至此，終可步向光明，公民卻又拒戰港超聯，兜兜轉轉走到目的地——元朗。
唔介意開齋都做配角
上周聯賽入球追平標準灝天，是他加盟以來首個「士哥」，焦點卻落在輸波離隊的楊賜麟身上。主角光芒，總是擦身而過。「要有好好眼力先會留意到我。或者普遍球迷覺得我防守為先，但我依家比以前進取咗，練波亦會加練射門。」3年前與他並肩入選省港盃的元朗隊友鄭璟昊與張志勇，先後被大球會賞識，留守舊地的光仔另有得着：「港隊左閘人選比我資歷豐富有張健峰，比我後生又有方栢倫、黃梓浩，我喺中間好尷尬。成日要同最好比較實唔開心，最緊要珍惜當下，更何況今季元朗令我更加有發揮。」哪怕長路曲折，細味沿途風光，其實也可很快樂。
文/圖：徐嘉嘉