伍家朗放假外遊 開心過聖誕
聖誕節對大人和小朋友來說，都是一個普天同慶的節日；小時候大家都想收到聖誕老人的禮物，長大後雖然知道只是童話，但收禮物的憧憬不曾消失。今年在香港羽毛球公開賽榮升超級賽冠軍，但港將伍家朗其實只是22歲的「小朋友」，來到聖誕夜，他在嘉年華盡顯童真一面。回顧充滿刺激、喜悅的一年，「家朗」坦言已經收到今年最好的聖誕禮物，亦展望明年可以再有突破！
父母送超人最難忘
剛由杜拜出戰國際羽聯總決賽返港，今晚又是聖誕夜，伍家朗來到嘉年華鬆一鬆。在羽球場上認真、拚搏的他，其實場下亦是個貪玩的大細路。在遊戲攤位贏到多隻公仔，表現出童心未泯的一面。談到聖誕，他回想小時候有一年最難忘：「細個幾歲好鍾意玩超人，有一年聖誕我仲瞓緊覺，突然發現被窩入面有1盒超人擺喺我心口，嗰陣超開心，即刻去問爸爸、媽媽玩具點嚟，佢哋話係聖誕老人送畀我，當時真係信架！」長大後當然知道聖誕老人只是童話，但「家朗」每年聖誕仍然期待一份來自「鬍鬚伯伯」的禮物。
「今年對我嚟講，其實係好精彩，因為有好多經歷都係第1次，包括打湯姆斯盃單打、奧運、超級賽冠軍同埋杜拜總決賽，全部都係第1次，達成咗好多夢想，今年絕對係大豐收！」說起精彩的2016年，伍家朗笑得燦爛，他更搞笑表示，聖誕要送自己1份大禮物。「打香港公開賽之前，已經應承過自己，如果打得好就買隻錶畀自己，我覺得男人一定要有一隻屬於自己嘅靚錶。」
新年願望遠離傷患
經歷豐收的一年，伍家朗今年聖誕會與家人到日本歡度節日：「已經有兩年冇同屋企人去旅行，難得全年都飛來飛去比賽之餘，仲可以以旅行形式去外國，想好好把握呢段時間同屋企人共聚天倫。」對於未來展望，「家朗」期待新一年可以遠離傷患，以健康身體繼續尋求新的突破。
圖／文：王藝霖、袁志浩