新丁長人胡卓斌落場嗌興奮
如果有留意東方龍獅最近幾場ABL比賽，大家有否看到球隊出現了一個「高佬」新臉孔，他就是今季加盟東方龍獅的胡卓斌（Ben）。由甲二球隊直接轉投本地「Big 3」之一，更有機會在東南亞職業籃球聯賽落場，胡卓斌坦言十分興奮：「雖然頭三場加埋淨係落場10分鐘，但始終自己未打過甲一，首次代表東方龍獅就打ABL，真係好開心。」
系統訓練進步大
身高2米06但體重只有95公斤，胡卓斌與一班ABL對手比較，體格上始終比較輸蝕：「ABL大部分都係外援，體格上大隻過我哋，呢幾場打落體能上其實有啲吃力。」由10月初開始在東方龍獅跟操，Ben覺得自己體能已經有很大進步：「球隊訓練好有系統，連拉筋都拉得比較足，唔止體能有進步，仲學到好多戰術同走位。」
經過三場ABL之後，Ben自知仲有好多改善空間：「除咗打中鋒之外，都要睇番教練畀我打邊個位置，有時可能要打大前鋒，所以要練到自己靈活啲，不過都想做Gym練大隻，最重要可以幫到球隊！」